HRIET LO LÊNGI ZÛN

Pic: Abigail L Hmar


Ziektu: H.Zate , Hmar Rûn.

Kha Nu ka hmu hma khan chu hriet ngai naw Nunghak pakhat leia buoi an ti hi ka ring ngai nawh; Sienkhawm, Kha zantieng ni innem riei kara hmeruo ka’n chawk zo, ka umna tieng ka pan țuma kha nu  ka hmu a inthawk ruok khan chu hrilfie nawk chuong  ngai lovin ka chieng ta kher el.

Assam khawpui hi ka ta dinga a lien zie ka hrietchieng tluk zetin nunghak an tam zie khawm ka hriet chieng a. Anachu, kha nu ang renga ka lungril hluotu ka la hmu nawh. 

Hmeruo inchawin, ka’n chawk zo chun ka umna tieng ka pan a. Nuhmei pakhat, a pieng inkhai tli zat el, a hmel le pieng zie reng rengah sietna hrim hrim um naw le zun le ek khawm nei naw hmel put chu ka hmaah chun a lawn ve mek a. A changin ka fe pel a, a changin a lam lawn en nuom leiin a hnungah ka um nawk vat hlak. Ama ngaituo reng reng khan ka buoi a ni deu tak.  A țha naw titu chu ka ta ding chun khel hril an ni hiel awm ie. A pieng, a kut le ke, a hmel, a iengkim el kha țhatnain a sip a, țhatna po po hi a ta a ni ringawt!
Lampet pakhata  a pet tawm chun ka en nasa taluo leiin a pet ding ka lo hriet fuk naw a, ka thil khai a mi sukbuokpek a, inphalam le inzak hmel em emin a mi rut pui a. A kut hmawr inno nghielin ka kut a hung tawk zau khan val hi ka buoi sie vawng a. Ka ngaituona-ah thil tam tak hung lutin kha hun sawt nawte sung khan Pathienni zingkara  kan nauhai thawlawm a sem lai chenin ka ngaituo phak.  A hmel țha em em kha siemtu hin a siem uluk bik am? A siemna khawl a țha bik? ti chu ka lungril sukbuoitu pakhat a ni laiin, kha ngei kha siemtu themthiem zie mi’n hriettirtu a ni nawk si!

A hmel țhat em leia Hmar     nupui nene tui ringa seilien a ni ka ring naw laiin, inba nuoia ka țawng a hriet le inruola Hmar Țawng indik tak a a mi biek khan  a laka ka luongliemna a sukzuol ngei el. Pu Ramsuok-in,

 ‘Hieng lawma hmelțha hi,

Zun le ek le hnap khawm,

I nei ka ring thei nawh ie, 

Hmel țha em em nu!’ 

a lo ti kha hi nu ngei hi ni dingin ka ring nghet bur.
A hming ka hriet naw le hriet ngai naw nunghak lei chun ka lungril le ngaituona a buoi zova, ama ta dinga ieng ni lo ding ni si hi,  ka ta ding chun mi pawimaw a ni si. A hmela innui hmel mawl khan ka mit a lakin ka lungril a hne a, a bienga biengsum inkhur kâk el khan ,’Biengsum hi Hmangaina Dil a nih!’ a mi’n ti tir naw thei nawh.
Kan hei ințhe tawm chun, ‘Mangțha’ tiin a’nnui sieuva, a va hei mawi de aw!  kha mawl kha a nih, Nghal tienga ka u hai, Robert, Enok le ElArEs hai khawma an tuor hla rek ding chu! Inngaizawng a inzawmna nei si lo khan a kawla um zing ka nuom luot leiin kan ințhe zet khan chu Vincent Hekte Hmar -in mawi le thiem em em a a sak, 

A Pawi Ngei,

Sam Ang Ințhe,

A pawi Ngei!’ 

ti hla kha Vai Flim a Bekgraun Miuzik hung inri ang hin ka lungrilah a hung inri ral ral a. A lutna in, a umna ngeiah chun lut ve a, thei nisien, dam sunga um dingin thaibawi chan khawm chang ka’n zuom hiel awm ie. 
In ka hei lut chun, HRIET LO LÊNGI ZÛN chungchang chu Ka Tupa Lalramsan ka hril a. “Léng ei tih!” a ti a, “An run sang kai ka’n zuom nawh!” tia ka dawn chun, “Pute, i’nfit naw bawk a nih. Kai lovin lawn el naw ti ni.” a mi ti a. Nunghak pakhat a hung leng leiin kan titi kan suktawp ta a!

😂😃😜

05 May 2017 | Guwahati
https://hzate.wordpress.com/

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s