UNSPOKEN LOVE

Model : Ms Mapuii


Ziektu : H.Zate, Hmar Rûn.
( Based On True Story. )

Ka pa phone hung inri ral ral chu ka pain a hriet inlau tak pumin inrang deuvin ka en a. Ka pa chun a hriet ta ngei a, ‘iem inhmaw deu a i en hlak hi?’ a ti a. ‘Iengkhawm.” ti chauin ka dawn a. Network a țha naw bakah thu hril ding em em kan hriet naw bawk leh Phone a msg save ta sa dam kan inthawn vel mei mei a. 
Dit le hmangai em em tawng a, hmangaina inhlan a inkawppui dingin tlinna ka nei nawh ti hre zing si, lungrilah a ruka pai tlawk tlawk  bak thaw thei naw zie inhre puma a ruka lo hmangai baka rinum a um awm nawh.

 Khang hunlai kha ka ngaituoin tu chen hin biengah mitthli a la luong hlak. Kha tleirawl hmangaina nun kan sikul a inthawka ințan, kan suok hnung chena ka la buoipui, kha hril suok naw hmangaina kha hieng ang lawma ka natpui hi ka ring ngai nawh. 
Hmel țha ti em emin ka lo thlir liem ve hlak a, ka lungril hin ka lo dit em em a. Sienkhawm, ama ruok chun unau angin a mi en hlak.

Pawl X kan Camp lai a ni a, hun awlah kan khum sengah inthungin kan hohlim a, ka ruolhai  chun  a ruka an lo dithai chanchin hrilin  duthu an sam a, chulai tak chun, “Kei kawm ka nei”  ka zuk ti phut chu mak an tiin an awi naw kher el. Hre chak deuvi, an mi’n dawn a, kan  class a pasal hai ,an lar deu hai a dawt dawtin an hming an hung hril lei a, a ni naw thuin ka lo dawn pei a, ka star pa hming a hung hril suok char chu a hriltu nu ka hei baw tawp a blanket in ka’n khum a ka thung de tawp. Ka’n zak taluo,sa papin, amain a hriet ve khawm ni lovin zantieng bu khawm fa ngam lovin roomah ka inkhum tawp. 
Ka dit a, ka dit ngawi ngawi a, Anachu, nuhmei lem ka ni bawk ama ka hril ngam nawh. Ka ruolhaiin a chanchin an hriet ang ang an mi hril hlak a. Ka ditzie khawm ama chu an hrilpek ngei ka ring! Chu el naw khawm chu ka ditzie a hriet ka ringna chu; kan classmate pakhat leh uniform a an thlalak chu  hostel class kan laklai mi pakhatin a phawr  a, pasal pakhat lem chu  ka ruol nu pakhat in a lo star a, keiin pakhat ka star bawk leiin kan dit hai thlalak chu kan chep thlak a, kan lak ve ve a. Thlalak neitu chun ka star pa kuomah, “I  thlalak a lak ie.” tiin an  sawisak a. Inzak hle lang khawm ka dit em leiin iengkhawm hril lovin ka lak tho a, tu chen hin ka la sie țha zing.

Ama leh chun kan inbiek ngai nawh. Keiin Ka biek ngam naw a, ama hlakin a mi biek ngam bik si nawh. Mi har le mi ti zawk zawk a lo ni naw bawk leh kan inang bawk si a. A buoithlak kuol vel vawng a nih. Pasal dang ang chuu ni sien ka dit ti a hriet leiin mi ngaisak ve ngei a tih. Sienkhawm, hi pa hi chu a danglam tlat. Rooma inkhum char char chi ani a, a suok sun sun chu hmu tum in ka room tukver a inthawk chun ka lo inchan hlak a, inchan suok chang um sienkhawm, ka hlawsam chang a tam lem! Ama leia nuor ngawia ka khum ka bêl nawk chang a tam a, ama lei bawkin hlim takin ka in nawk hlak si! A lawn le a um dan iengkim kha ka mitah a mawi a. Siemtu hin a siem thiem bik hin ka hriet hlak!

Tea time a dinning hall-a  roll call nei pha a rukin ka  lo en hlak a, kan mit a’ntuok hlak chun ka en ngam nawk ngai si nawh. Ama ka hmu nuom leiin, ka pei naw sa sain Study hour zo a detention period-ah ka țhang ve hlak a. A kawl hnaia ka um theina po kha chu inhawi ka ti a. Kan hostel compound khawm kha ama ka hnaina tak a ni mieu leiin inhawi ka ti naw thei nawh.

Ka ruolhaiin a chanchin an hril ringawt khawmin ka hlimpui a, a ruolpa leh inpawl ringawt khawm kha a zieum ve vieuin ka hriet!

Campus a a’n lawn vel ka ruol haiin an hmu pha an mi hril a, ka en ngawi nawi hlak.   Bei/biscuit a nei naw pha ka sem hlak a, ka suok chun tam naw sienkhawm ka hawn pek hlak a. Ka thilpek a dawng nuom ringawt khawm kha ka lawm , ka ta dingin uongpui khawpin ka ngai. A’nchei dan dan hi nal ka tiin ka mit a lak vawng a.  Ka dit ngawi ngawi el a nih.
Vawi khat chu puon ka sawp a, kan ruol pasal dang hai kan sawp pek zie tho leiin, “Puon sawp ding i nei chun mi pe raw !” ka ti a, a hung chawi a, inphalam deuvin, “a bal ding a ni aw.” a ti a. Kha inphalam țawngbau mawl kha ka nakawra ding hin a va mawi chieng de aw! Ieng anga bal khawm nisien, a ta a ni phawt chun ka sawo nuom vei leh. Mi tu khawm a’n sawptir ngam ve naw leiin a lo bal hle a. Sienkhawm, sawp inhawi ka ti tlat! Ka  sawp zo chun ka ruol hai leh fiemna’n kan la hmang a. Inzak hmel deu a a meng mawl kha a nih mi hne em em hlaktu chuh. A  puon hul  pek kir nawk hun ding chu  ama ka hmu theina ding a nih ti ka hriet keiin ka nghakhla em em a. Ka hmu hlak chun iengkhawm ka hril ngam nawk chuong si nawh.

Mi lai a hming lam  ka ngam si naw, ka ruolhaiin an star hai hming ding an phuok pek a. Zanah ka ruolhai leh toilet fe malam in step a ințhung in kan hohlim a, a chanchin kan hril lai zingin thlavar zan a ni bawk ,thlapa le arasi tam tak hmu dg aum a,chu lai a ka mit la tu deu arasi var deu ka hmu ta hlau el a. Chu zan a inthawk chun, Ama hriet lovin a hmingah ‘Morning Star’ ka lo inbuk ve ringawt a.

Hostel um sung kha chu ka ta ding chun an hawi lai tak le hun hlu tak a nih. ka khuo sawt khawm in nitin hmu thei naw lang khawm hmu dinga beiseina a um tlat leiin anhawi a. compound khat a um ni in la khawm ni tin ka hmu thei bik naw a. Ka hmu naw chang chun ni hi a sawt bikin ka hriet hlak. Ral a thlir  le lungrila lo ngaituo ve char kha ka thaw thei um sun a ni a, iengtika ngaizawng le star hre ngai lo le hril ngai naw ta ding chun inzak le infawmin a kawlah ka um chun ka hril nuom khawm hril ngam lovin, ka hriet nuom khawm ka’n dawn ngam ngai nawh.
Camping tawp a hnai a, ka khuo a lo sawt lawk a. Thla vawikhat bek inlak pui ding tiin a tawp zan chun  ka huoisenna po po khelah ka ruolhai huoisenna belsain class lak zovin thla ka’n lak pui a, thaw ta rau rau tiin tam deu kan inlak nghe nghe. 
 Hostel a inthawka kan suok hnungin digital a thlalak hai ka en a ka ruol ngaina le ka khawsawt leia a ruka ka țap chang a tam khawp el. Thlalak hai ka ruolnu leh kan print a, ama thangna po chu ka print vawng a. Hostel suok a inthawk chun kan inhmu ngai ta naw a, exam hmasa tak niin vawi khat ka hmu vuot ti naw chuh.

Exam zo kan khuoah kirin, result nghakin kan chawl a. ka pa phone in kan in text zeu zeu hlak. network hlak chu abo sung a sawt lem, zani a ei thawn kha  vawisun a reply  hmu chau chang a tam.
Mesg khawm chu forward mesg,  ieng lim lim am a nih,  guitar lim or love sign kha kan in forward kha a ni el a. Bie ngam tak tak si lovin, biek chak bawk si. Biek naw tawp nek chun a zieum ka ti a, a chang chu network umna deu kan in a inthawk ahla ve deu hmun pakhat a um a, chu chen dam chu ka va tlung chang a um hlak. Ka ngaiin ka thlakhla em em a. A msg pakhat ka dawng khawm chu ka ta dingin hlimna mak tak intluntu a ni tlat si. Chuonga inbe paw țha thei lova kan um chu rinum ka tiin ka ngai ngawi ngawi hlak.
Result hung suok a. Ka huphurin ka nghakhla naw kher el.  Ka result nekin ama ta ka ngaiven hmasa lem a, ka nekin a thaw țha naw lem a, mak ka tiin ka tuorpui takzet a. Pass țha vieu lang khawm ama a pass țha naw leiin ka lawm a kim thei nawh. 

Ka buoina pakhat a liem a, turuok hin chu  khawlai Sikulah am a kai ding ti ringawtin ka lungril a sukbuoi nawk tah.

21 May 2017 | Guwahati

Sunzawm ding!—–>

Advertisements

One thought on “UNSPOKEN LOVE

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s